話說今日一如以往兩個月一樣9點起身, 一開機睇到美佬又大插4舊幾... 心知...想去廁所... 隨手書架上見到本"窮爸爸富爸爸"(Rich Dad, Poor Dad), 一於拎入廁所睇下邊度有得換爸爸先......!!!
其實我中英文版各睇左一次... 廁所內只係重溫一下... 睇多兩野先恍然大悟: 原來本書係教人點樣由富爸爸變成窮爸爸!!!
先講講本書來歷(用我有限o既記憶...), 作者羅伯特．Ｔ．清崎係一個夏威夷日本混血兒, 之前職業為Sales (好似係打印機野... 勉強算係同行...), 後來靠投資小有所成成為自由投資者。佢有感民眾應該增加自己對財務o既知識, 於是發明左一隻叫現金流o既遊戲。而為左宣傳呢套game 佢就寫左呢本書, 誰不知書還比隻game 本身還出名... N年前成為香港似乎人人必讀o既書。本書中心目標係教人如何跳出一般人的老鼠賽跑(Rat Race)而令自己的資本增大再最終致富。
基本上佢叫人提高財商我唔反對啦... 我亦一向同意人人都應該有少量會計/帳目知識... 作者亦唔係叫人好似我咁唔做野妄想靠投資搵食...
呢一年次按問題影響全世界經濟, 尢其係呢兩個星期... 今日睇左本書先醒覺: 次按風暴咪就係美國人信x左呢類作者o個套攪出黎架囉!!!
(以下係憑我僅有記憶段章地分析出來... 有錯請插... 以"害人爸爸程度" 低至高排序)
1. 工字不出頭 投資才是發達王道: 本身我唔係唔同意啦, 但係佢似乎缺少教人投資有風險, 我o既理念係教人管理風險似乎比教人去投資更重要, 但係佢提及唔多... 作者顯然表露看不起勤勤懇懇傳統又保守的打工仔(作者的窮爸爸) 而表揚有"財商"令其他人及金錢為其打工的人(富爸爸)... 而且... 作者似乎太看重"發達"(Rich) 作目標而忽略想致富同時亦同樣機會致窮。
2. 建議人一定唔可以僅靠儲蓄致富: 又係一樣一半同意o既point... 但羅伯特文中甚至有隱含恥笑人儲蓄... 又或者覺得手持cash 不如拎去投資... 太著重現金流入(cash flow in) 多或少而少少貶低作後備的手上資金(capital)o既重要性。市道好時當然要多多投資, 但後備資金對於逆市時o既重要性似乎有所忽略... 問題係cash flow 係會變化的東西, 今天cash flow in 的東東明天可能就會蝕錢... 再加上佢建議人o既投資方法之"犀利"......... 下面會講...
3. 看不起保守投資組合: 羅伯特指現今的保守投資組合是"為了不輸而作的投資", 不切實際。佢認為投資就是為了致富, 指出要致富的話需要"勇於冒險"云云... 我看事實上同賭錢無分別... 要知道利潤跟風險永遠是相若的, 有統計指出"勇於冒險" 的投資組合經常比保守投資組合差... 呢樣都算數... 就算"勇於冒險"都睇下佢點樣做... 但佢似乎係獨孤九劍有進無退又或者係西部牛仔式作法...... "要羸就搏大羸大, 輸左都要覺得happy 覺得爽!"
4. 要錢搵錢, 還要用人地錢搵自己錢: 呢個基本上係近幾十年美國人o既投資態度。利用低成本借貸(如還息不還本, 高風險借貸如sub-prime)以至槓桿工具達致"別人的錢為你打工"的目標, 以及利用收到的資金再投資達致更多cash flow 增長。上面講過佢缺少講出可流動資金o既重要, 以佢做法的話一旦出現如今次次按問題就會有可能發生技資者資不抵債等問題。雷曼兄弟的破滅就係因為用不足夠的資本作槓桿來運作倍數的生意, 一旦市場有比較大的變化令資產未能抵消欠款形成今日o既亡局...
5. 致富就要靠投資, 但文中還重點建議人投資房地產甚至股票認股證: 過熱房地產就係今次次按元兇! 佢建議人靠尋找質數比較的好房地產, o向銀行作按揭, 利用房地產的收入(租金之類)令別人幫你供樓。待房子市價提高就可以轉手套現, 如果收入跟每月利息差不多的話(即係該房地產每月cash flow in 係0 或以上)基本上係0成本... 國情不同這個方法港澳不可行啦, 基本上次按風暴以前美國可以以還息不還本的方式做按揭, 問題是當房地產市場出現問題時所受的損失顯然書中少有提及... 比重上係講成功多於講失敗... 小弟觀點上從來都不會當房地產係投資工具(以後或者會講), 而且睇返上面第2點的話一旦每月cash flow 係負(蝕錢)時房地產是一樣很難出手的資產(相比其他工具)... 而家時勢睇返呢本書, 你話本書係唔係害死人?
而講股票認股證(窩輪)o個本我冇買但有睇過下... (佢講o既唔同香港o個d窩輪...) 基本上佢有講到窩輪係高風險(雖然佢都係著重高風險=高回報), 但係記憶中都係缺少風險管理內容... (有錯勿插... 窩輪o個本我係網上睇o既...)
最後雖然唔應該咁比較.. 但我都想將羅伯特跟股神巴菲特比教...
基本上我看羅伯特有如一個靠較高風險投資有所成, 之後就四出教人如何"致富", 又出遊戲又寫書"傳道"的一個人...
反觀股神巴菲特, 已經貴為世界第二首富(今日福布斯o岩o岩公佈o既... 第一位係53歲就已經退休周圍印印腳派錢o既Bill Gates 叔叔~ 我都好想寫篇野潤下呢單野...), 78歲高齡不旦少說話多勤勤懇懇工作, 而且不會四出教人"財技"甚至一本正式自己寫的書都沒出過... (市面的巴菲特書幾乎全部唔係佢親自寫...)
兩個強烈對比...
